Waziri Mkuu mstaafu, Kassim Majaliwa, amezindua rasmi zoezi la uuzaji wa hisa stahiki za Mwalimu Commercial Bank Plc, akitoa wito kwa wanahisa na Watanzania kwa ujumla kuchangamkia fursa hiyo ili kuimarisha mtaji wa benki na kuchochea ukuaji wa uchumi.
Uzinduzi huo umefanyika leo jijini Dar es Salaam, ambapo Kassim Majaliwa amesema hatua hiyo ni ya kimkakati katika kuongeza uwezo wa kifedha wa benki na kupanua huduma zake kwa wananchi wengi zaidi.
Amesema mpango wa hisa stahiki unatoa nafasi kwa wanahisa kuongeza umiliki wao huku ukiwezesha benki kupata mtaji wa ziada kwa ajili ya kuimarisha utoaji wa mikopo nafuu kwa walimu, wafanyakazi na wafanyabiashara wadogo na wa kati.
Aidha, ameongeza kuwa hatua hiyo itawezesha Mwalimu Commercial Bank Plc kuendeleza matumizi ya teknolojia za kidijitali, jambo litakalosaidia kuongeza ushirikishwaji wa kifedha nchini.
Kassim Majaliwa pia ameipongeza benki hiyo kwa ukuaji wake tangu kuanzishwa kwake, akieleza kuwa ni mfano mzuri wa taasisi iliyoanza kama wazo la walimu na sasa imekua na kuwa benki ya kitaifa inayohudumia makundi mbalimbali ya jamii.
Kwa upande wake, uongozi wa benki hiyo umeeleza kuwa zoezi hilo linafanyika kwa kushirikiana na wadau wa sekta ya fedha wakiwemo Mamlaka ya Masoko ya Mitaji na Dhamana (CMSA) na Dar es Salaam Stock Exchange (DSE) ili kuhakikisha mchakato unakuwa wa uwazi na ufanisi.
Uzinduzi huo unatarajiwa kuongeza thamani ya uwekezaji kwa wanahisa pamoja na kuimarisha nafasi ya benki katika soko la huduma za kifedha nchini.
#Trending #trendingreels #TanzaniaYetuUPDATES #tanzaniayetu #trendingpostchallenge #trendingreelsvideo
0 Comments